மொரார்ஜி தேசாயின் இயற்கை நலவாழ்வியல்.

முன்னாள் பிரதமர் மொரார்ஜி தேசாய் 1983ல் ஒரு பத்திரிகைக்கு அளித்த பேட்டியை சமீபத்தில் படித்தேன்.

 மொரார்ஜி தேசாய்

அவரது பேட்டி இதோ—

மொரார்ஜி: உயிரே போனாலும் நான் புலால் உணவைச் சாப்பிட மாட்டேன்; தடுப்பு ஊசி போட்டுக் கொள்ள மாட்டேன். நான் சென்ற எல்லா நாடுகளிலும் இவ்விஷயத்தில் எனக்கு விதி விலக்கு தரப்பட்டது.

கேள்வி: அப்படியென்றால் நீங்கள் வெளிநாடுகளுக்குச் சென்ற போது, அதைப் பற்றிய தஸ்தாவேஜுகளை உடன் எடுத்து செல்லவில்லையா?

மொ: ஒருபோதும் இல்லை. சின்ன வயதில் எனக்கு தடுப்பு ஊசி போடப்பட்டது. அதன் பிறகு, இயற்கை முறை சிகிச்சை தான். என்னுடைய குழந்தைகளுக்குக் கூட நான் தடுப்பு ஊசி போட்டதில்லை.

கே: மருந்து, மாத்திரைகள்?

மொ: "அலோபதி' மருந்துகளை நான் சாப்பிடுவதில்லை; சில சமயங்களில் ஆயுர்வேத மருந்துகளை சாப்பிடுவேன்.

கே: மலைப் பிரதேசங்கள் போன்ற உயரமான இடங்களில் உள்ள நம் ராணுவ வீரர்கள் சண்டையிட, மது அவசியம் தேவை என்று சொல்கின்றனரே...

மொ: இது சுத்த ஹம்பக் - முற்றிலும் தவறு. எவரெஸ்ட் சிகரத்தில் ஏறியவர்கள் மது அருந்தவில்லை. அவர்கள் மது அருந்தியிருந்தால் எவரெஸ்ட்டில் ஏறியிருக்க முடியாது. தென் துருவத்திற்கும், வட துருவத்திற்கும் சாகசப் பயணம் சென்றவர்களும் மதுவைத் தொடவில்லை; தொட்டிருந்தால் இறந்திருப்பர்.

கே: குளிரை சமாளிக்க ரஷ்யர்கள், "ஓட்கா' அருந்துகின்றனரே?

மொ: அவர்கள் அப்படிப் பழக்கப்படுத்திக் கொண்டனர். 1955ல் ரஷ்ய அதிபர் குருஷேவும், புல்காணினும் இந்தியாவுக்கு வந்த போது, பம்பாயில் மதுவிலக்கு அமலில் இருந்ததை என்னிடம் பாராட்டினர்.

கே: உங்கள் தினசரி வாழ்க்கை எப்படித் துவங்குகிறது?

மொ: காலை, 4:00 மணிக்கு எழுந்திருப்பேன். டாய்லெட் செல்வேன்; குளிப்பேன். இதற்கே ஒரு மணி நேரம் பிடிக்கும். பிறகு, பிரார்த்தனை செய்வேன். காலை உணவு நான் சாப்பிடுவதில்லை. தினசரி இரண்டு வேளை தான் நான் சாப்பிடுவேன். அறுபது வயதிற்குப் பிறகு, ஒருநாளைக்கு ஒரு முறை தான் உண்ண வேண்டும். 45 வயதிற்குப் பிறகு, ஒரு நாளைக்கு இரண்டு முறை சாப்பிட்டால் போதும். நான் வெறும் பாலும், பழமும் சாப்பிடுவதால், ஒரு நாளைக்கு, இரண்டு வேளை சாப்பிடுகிறேன். பசும்பால் தான் சாப்பிடுவேன். அந்தந்த சீசனில் கிடைக்கும் எல்லாப் பழங்களையும் சாப்பிடுவேன். ஏனென்றால், இவை எளிதில் ஜீரணமாகும். காலை, 9:45 மணிக்கு பகலுணவு சாப்பிடுகிறேன். மாலை, 6:45க்கு இரவு உணவு.

கே: இந்த மாதிரி உணவுக்கு எப்போது மாறினீர்கள்?

மொ: ஜூன் 26,1975லிருந்து... அதாவது, நெருக்கடி நிலைமையை ஒட்டி என்னை சிறையில் வைத்த நாளிலிருந்து.

நன்றி  தினமலர் வாரமலர்.

6. இயற்கை நலவாழ்வியல் நூல் அறிமுகம் 

முனைவர் பொற்கோவின் ''நல்ல உடல் நல்ல மனம்''

(டாக்டர் பொற்கோ சென்னைப் பல்கலைக் கழக துணைவேந்தராக  இருந்தவர்)

முனைவர் பொற்கோ

1982-ல் வெளியான டாக்டர் பொற்கோவின் ''நல்ல உடல், நல்ல மனம்'' என்னும் இந்த அரிய நூலின் மதிப்புரையில் முனைவர் ந.சஞ்சீவி, (அந்நாளைய சென்னைப் பல்கலைக் கழக தமிழ் துறை தலைமை பேராசிரியர்) இவ்வாறு கூறுகிறார்:

"எண்வகை யோக நிலைகளையும், எண்வகைச் சித்திகளையும் டாக்டர் பொற்கோ அறிவோடும் அனுபவத்தோடும் குழந்தைகளுக்கும் புரியும் வகையில்-முதியவர்களும் குழந்தைகளாகிப் புரிந்து கொள்ளும் வகையில் - விளக்கியிருத்தல் வியப்பும் விம்மிதமும் தருகிறது. படிப்படியாக (Step-by-Step) பதஞ்சலியும் பாராட்டும் வகையில் யோக வாழ்வுக்கு ஒரு பால பாடத்தையே டாக்டர் பொற்கோ அவர்கள் அமைத்திருத்தல் தமிழுக்கும், தமிழ் மக்களுக்கும், தமிழ் குழந்தைகளுக்கும் பெரிய யோகம்தான் ! ஆசிரியரின் பண்பட்ட பகுத்தறிவும், முதிர்ந்த மொழியியல் அறிவும் தகவு சான்ற தனித் தமிழ் உணர்வும் நூலின் பல்வேறு இடங்களிலும் பளிச்சிடுகின்றன." 

இந்நூலுக்கு முன்னுரை எழுதியுள்ள திரு அ. மெய்யப்பன் (இவர் தமிழ் நாடு மின்சார வாரியத்தில் கண்காணிப்பு பொறியாளராக பணி செய்து ஓய்வு பெற்றவர். தற்சமயம் சென்னையில் வாழும் இவர் யோகா மற்றும் இயற்கை நலவாழ்வியல் ஆசிரியர்/பயிற்சியாளராக சேவை புரிந்து வருகிறார். இயற்கை நலவாழ்வியல் முகாம்களை நடத்துவதில் முப்பது ஆண்டுகளுக்கும் மேலான அனுபவம் கொண்டவர்) எழுதுகிறார்:-

"இருபது ஆண்டுகளுக்கும் மேலாக தொடர்ந்து பயின்று வந்த பயிற்சியையும், பல்வேறு நூல்களை ஆய்ந்து பெற்ற அறிவையும் சாறாகப் பிழிந்து தமிழ் மக்கள் பயன் அடைய வேண்டும் என்ற நல்ல உள்ளத்தோடு அறிஞர் பொற்கோ அவர்கள் கோதமன் என்ற புனைபெயரில் கட்டுரையாக தொடர்ந்து விளையாட்டுக் களஞ்சியம் என்ற மாத இதழில் 'நல்ல உடல் நல்ல மனம்' என்ற தலைப்பில் எழுதி வந்தார்கள். அந்தக் கட்டுரைகள் நூல் வடிவம் பெற்றால் மேலும் பொதுமக்களுக்குப் பயன் தரும் என்பதால் நூல் வடிவம் தந்துள்ளார்கள்....

யோகாசனப் பயிற்சி, மூச்சுப் பயிற்சி, தியானம், அட்டமா சித்திகள் என்னும் மன ஆற்றல்களை வளர்க்கும் பயிற்சி என்பன போன்ற பல பிரிவுகளை உள்ளடக்கிய யோகக் கலை என்ற அருங்கலை பற்றித் தமிழ் தெரிந்த அனைவரும் படித்துப் புரிந்து கொண்டு பயிற்சி செய்து பயன் பெறத்தக்க வகையில் இந்நூல் முறையாகவும், தெளிவாகவும், எளிமையாகவும், சுவை பொருந்தியதாகவும் அமைந்துள்ளது.....  மனத்தை செம்மைப் படுத்தவும், உயர் நிலைக்கு மனத்தைக் கொண்டு செல்லவும், நிம்மதி பெறவும், மனதை நடு நிலையில் வைத்துக் கொள்ளவும், உள்ளொளியில் ஒன்றவும், உள்ளொளியில் ஒன்றியவர்கள் தொடர்ந்து இன்பமயம் என்னும் பேற்றைப் பெறவும் உதவுகின்ற வகையில் அறிஞர் பொற்கோ அவர்கள் உருவாக்கி உலகுக்குத் தந்துள்ள 32 இன்பமயப் பாடல்கள் இந்நூலில் இடம் பெற்றுள்ளன." 

"நவில் தோறும் நூல் நயம் போலும்" என்ற மாதிரி, அட்டாங்க யோகம், அட்டமா சித்திகளைப் பற்றி நூலாசிரியர் எளிமையான தமிழில் ஆர்வத்துடன் படிப்பவர் எவரும் புரிந்து கொள்கிற வகையில் விளக்கி இருக்கும் பாங்கு போற்றி வணங்கத்தக்கது.  சான்றாக நூல் ஆசிரியர் அட்டாங்க யோகம் என்னும் எட்டுப் படிநிலைகளை தெளிவான தமிழில் விளக்குகிறார். எண்பதுகளில் நான் யோகம் தியானம், அட்டமாசித்தி பற்றி அறிந்து கொள்ள முயன்று அப்போது கிடைத்த புத்தகங்களில், வடமொழி/தமிழ் மொழிக் கலப்புடன் (மணிப்ரவாள நடையில்) எழுதப் பெற்ற விளக்கங்கள் எனக்கு குழப்பத்தையே தந்தன. யோகம், தியானம் பற்றிய சரியான புரிதல் தோன்ற தடைகள் இருந்தன. ஆனால் இந்த விளக்கங்களைப் படித்த பின்னர்தான் எனக்கு தெளிவு ஏற்பட்டது.  நான் தெளிவு பெற உதவிய அந்த விளக்கங்களை இங்கே காண்போம்.

1. இயமம் : தக்கனவும் தகாதனவும் (சமூக ஒழுக்கங்கள்)
2. நியமம் : சரியும் தவறும் (தனி மனித ஒழுக்கங்கள்)
3. ஆசனம்: ஆதனம் (ஒரு அருமருந்து.)
4. பிராணாயாமம்: மூச்சு நடை (மூச்சாற்றலை ஒழுங்கு படுத்துதல்)
5. பிரத்தியாகாரம் : விழிப்பு நிலை (மன ஆற்றலை சிதற விடாமல் ஒரு இலக்கில் திரட்டுவது).
6. தாரணை : திரட்டிய ஆற்றலை ஒரு இலக்கில் செலுத்துவது.
7. தியானம் : மன ஆற்றலை அந்த இலக்கிலேயே நிலை நிறுத்துவது.
8. சமாதி : நிலை கொண்ட மனத்தின் அமைதி அனுபவம்-(பேரின்பநிலை )

இந்த விளக்கங்களை படித்த பின்னர்தான்,  நமது உடல், மன இயக்கங்களை ஆளும் கலையை படித்து உண்மைநிலைதெளிதல் என்பதையே முன்னோர்கள் சச்சிதானந்தம் (சத்து-உண்மை, சித்து-அறிவு, ஆனந்தம்-பேரின்பநிலை) என்று கூறி உள்ளார்கள் என்பதை,  உண்மை அறிவே இன்பமயம் என்பதை நான் புரிந்து கொண்டேன்.  இது போன்றே அட்டமாசித்திகளைப் பற்றி குழந்தைகளும் கூட மிக எளிமையாக புரிந்து கொள்ளும் வகையில் முனைவர் பொற்கோ ஐயா அவர்கள் விளக்கி எழுதி உள்ளார்கள். 

இந் நூல் பற்றிய விவரம்: 

• நூலின் தலைப்பு:  நல்ல உடல், நல்ல மனம்.
• பக்கங்கள்: 150
• வெளியீடு: பூம்பொழில் வெளியீடு, 16, 6-வது குறுக்குத் தெரு, சாஸ்திரி நகர், அடையாறு, சென்னை - 20
• விலை ரூ.30

• இந்நூல் கிடைக்கும் இடங்கள்: 

1. பாரி நிலையம், பிராட்வே, சென்னை 108
2.  தமிழ் நூலகம், ஆழ்வார்பேட், சென்னை 18
3.  ஐந்திணைப் பதிப்பகம், பாரதி சாலை, திருவல்லிக்கேணி, சென்னை 5

எனக்கு இந்நூல் அறிமுகமான விதம்: 

நான் 1992இல்  ஆடுதுறை இயற்கை மருத்துவ முகாமில் முதல் முறையாக பயிற்சி பெற்ற போது இந்நூலை திரு மெய்யப்பன் ஐயா அவர்கள் எனக்கு அன்புப் பரிசாக கையொப்பம் இட்டு வாழ்த்திப் பரிசளித்தார்கள். கடந்த திசம்பரில் (2010), முனைவர் பொற்கோ அவர்களை எனது யோகா ஆசான் திரு.தி.ஆ.கிருஷ்ணனின் இல்லத்தில் சந்தித்து அவரிடம் அறிமுகமும், ஆசியும் பெற்ற போது மிகவும் மகிழ்ந்தேன். இந்நூலைப் பற்றி வலைப்பூவில் எழுதலாமா? என்று கேட்டபோது அன்புடன் மகிழ்ந்து வாய்மொழியாகவே அனுமதி தந்து ஆசியும் தந்த பெரியவர், கற்றுணர்ந்த முனைவர் பொற்கோ அவர்கள் எனக்கு நல்ஆசியும் தந்தார்கள்.  பாடல்களை எல்லோரும் படித்து பயன் பெறத் தக்க வகையில் வெளியிட எனக்கு அனுமதி அளித்த முனைவர் ஐயா அவர்களுக்கும், இயற்கை நலவாழ்வியல் துறையில் தக்க அறிவும், பயிற்சியும் பெற்றிட எனக்கு எல்லா வகையிலும் ஊக்கமும், நல்லாதரவும் அளித்து வரும், திரு. மெய்யப்பன் ஐயா அவர்களுக்கும் எனது இதய நன்றிகளை தெரிவித்துக் கொள்கிறேன். 


வாழி நலம் சூழ.

5. இயற்கை நலவாழ்வியல் நூல் அறிமுகம் 

சுவாமி சிவானந்தர் அருளிய 'இயற்கை மருத்துவம்'

இயற்கை நலவாழ்வியல் அன்பர்களுக்கு என் பணிவான வணக்கங்கள். தவிர்க்க முடியாத காரணங்களினால் இந்த வலைப்பூவில் பதிவிடுவதில் நீண்ட இடைவெளி நேர்ந்து விட்டது. காக்க வைத்தமைக்கு மன்னியுங்கள். இயற்கை நலவாழ்வியல் தொடர்பாக தமிழில் நிறைய நூல்கள் உள்ளன. 


அவற்றை எல்லாம் கண்டெடுத்து உங்களிடையே ஒவ்வொன்றாக அறிமுகப்படுத்திட பெரிதும் முனைந்து கொண்டிருக்கிறேன். நிறையப் புத்தகங்களை சேகரித்து விட்டேன். அவற்றைப் படித்து ஒவ்வொன்றாக அறிமுகம் செய்ய வேண்டிய பணிகளை மேற்கொண்டு வருகிறேன்.

அந்த வரிசையில், ஐந்தாவது புத்தகமாக நான் உங்களுக்கு அறிமுகம் செய்ய இருக்கும் புத்தகம், இமயஜோதி ரிஷிகேஷ் சுவாமி சிவானந்தர் அருளிய ''இயற்கை மருத்துவம்'' (Practice of Nature Cure) என்கிற அரியதொரு நூல். 


இந்த புத்தகத்தை கடந்த மாதம் சென்னை புத்தகக் கண்காட்சியில் வாங்கினேன். இயற்கை நலவாழ்வியல் வாழ விரும்பும் ஒவ்வொருவர் வீட்டிலும் இருக்க வேண்டிய அற்புதமான  பொக்கிஷம் இந்நூல். 

இந்நூல் துவக்கத்தில் படிப்போரை கவரும் வரிகள்:

ஓம் சத்குரு பரமாத்மனே நம:

ஓம்.

எங்கும் நிறைந்துள்ள சிகிச்சை தரும் சக்திக்கு,

நம்மை பாதுகாக்கும் இயற்கை அன்னைக்கு,

இயற்கை மருத்துவத்தை ஊக்குவிப்போர்,

பின்பற்றுவோர் அனைவருக்கும்,

அதுபோலவே

பெரும் அளவில் மனித சமுதாயத்தின்

அனைவரும் உடல் நலமும், நீண்ட ஆயுளும்,

அமைதியும், மகிழ்ச்சியும் பெறுமாறு

இந்நூல் அன்புக் காணிக்கை.

ஓம்.

மேலும் சுவாமி சிவானந்தர் கூறுகிறார்: 

ஓம்.

8, செப்டம்பர் 1951

அமிழ்தத்தின் செல்வா,

உடல் நலமே பெருஞ் செல்வம்.

உன் வாழ்வின் உண்மையான அடித்தளம் உடல் நலமே. 

வலிமை வாய்ந்த உடம்பை வளர்த்துக் கொள்.

இயற்கையுடன் இணக்கம் கொள்.

உடல் நலம் பற்றிய, உடல் நல நூல்களைப் பற்றிய விதிமுறைகளைப் பின்பற்றி நடப்பாயாக.

அழியாத பேரின்பத்தை அனுபவிப்பாயாக.

உடல் நலம், அமைதி, நீண்ட ஆயுள், கைவல்யம் ஆகியவற்றை ஆண்டவன் உன் மீது பொழிவாராக.

- சுவாமி சிவானந்தா.

இந்த நூல் 33 அத்தியாயங்களையும், பின் இணைப்பாக இயற்கை மருத்துவக் கொள்கைகள் (ஒரு மீள் பார்வை) பற்றிய ரத்தினச் சுருக்கமான ஒரு கட்டுரையையும் கொண்டது.

இந்நூலை அருளிய சுவாமி சிவானந்தர் ஒரு மருத்துவர் என்பது இப்புத்தகத்திற்கு மேலும் வலிவையும், பொலிவையும், அதிகாரத்தையும் கூட்டுகிறது. ஆன்மீகமும், உடல் நலமும் இணைந்த பேரருளாளர் அல்லவா சுவாமி சிவானந்தர் ?

இந்நூலில் ஒவ்வொரு பக்கமும் அனுபவித்து படிக்க வேண்டிய செய்திகள் நிறைந்திருக்கிறது.

ஆசிரியரின் முகவுரைப் பகுதியில் இருந்து முக்கியமான சாரம்சத்தை மட்டும் இங்கே அன்பர்களின் பார்வைக்கு இடுகிறேன். 

ஒரே ஒரு நோய் தான் உண்டு.

அதற்கு ஒரே ஒரு காரணம் தான் உண்டு.

அதற்கு ஒரே ஒரு சிகிச்சை தான் உண்டு.

அந்த ஒரு நோய்:-
தவறான முறையில் வாழ்வதாகும்.

அந்த ஒரு காரணம்:- 
நீரில் உருவாகும் பொருள்களும், நோயை உண்டாக்கும் மலங்களும், உடம்பில் தேங்குவதாகும்.

அந்த ஒரு சிகிச்சை:-
உண்ணா நோன்பு, எனிமா ஆகியவற்றால் அழுக்குகளையும், மலங்களையும் வெளியேற்றல், விவேகமான உணவுத் திட்டம், நீர், கதி ரொளி,காற்று ஆகியவற்றால் குணம் பெறல் முதலியனவாகும்.

இயற்கை மருத்துவம் எப்போதும் இயற்கையான சிகிச்சை முறைகளையே பின்பற்றுகிறது. நீராடல், வெயில், ஓய்வு, பயிற்சி, எனிமா, பட்டினின், தூய காற்று, நீவி விடல் (மசாஜ்), கவனம் மிகுந்த விவேகத்துடன் கூடிய சரியான உணவு முதலிய இயற்கையான செயல்களின் உதவியையே அது பெறுகிறது. மருந்துகளை அது ஒரு போதும் ஊக்குவிப்பதில்லை.

வேதங்கள் அல்லது இமய மலை போல இயற்கை மருத்துவ முறையும் மிகவும் தொன்மை வாய்ந்தது. உடல் நலம் பேணவும், சிகிச்சை செய்யவும் (தற்போது) உள்ள முறைகள் எல்லாவற்றைக் காட்டிலும் அதுவே மிகவும் தொன்மை வாய்ந்தது. கிறித்துவுக்கு நான்கு நூற்றாண்டுகட்கு முன்பு (460-377 BC) வாழ்ந்த ஹிப்போ க்ரேடஸ் (Hipocrates)என்பார் இயற்கை மருத்துவ முறையின் உறுதி மிக்க ஆதரவாளராக இருந்தார். கதிரொளி, தூய காற்று, தண்ணீர், பயிற்சி, ஓய்வு, சரியான உணவு, நீராடல், நீவுதல் முதலிய இயற்கை நலவாழ்வியல் சிகிச்சை முறைகளை பயன்படுத்தி, மனித குலத்துக்கு நிகரற்ற பயன்களையும், அழியாப் புகழையும் பெற்றார். அவர் இயற்கை மருத்துவ முறையின் தந்தை ஆவார். (இப்போது கூட மருத்துவப் படிப்பினைத் துவங்கும் முன்னர் மருத்துவ மாணவர்கள் ஹிபோக்ரேடஸ் உறுதி மொழி (Hypocrates Oath) என்ற ஒரு உறுதி மொழியை எடுத்துக் கொள்வதை ஒரு மரபாக வைத்திருக்கிறார்கள். ஆனால் எடுத்துக் கொள்ளும் உறுதி மொழிகளுக்கும் இப்போதைய மருத்துவ சிகிச்சை முறைகளுக்கும், மருந்துகளுக்கும் இடைவெளி மிகவும் நீண்டு விட்டது என்பதுதான் சோகம்!)

இயற்கை மருத்துவ முறை ஒரு சாதாரண மனிதரை, டாக்டரிடம் சென்று, காத்திருக்கும் அறையில் கடினமும், கவலை மிகுந்த பல மணி நேரங்களைக் கழிப்பதில் இருந்தும், டாக்டருடைய மனிதாபிமானமற்ற கட்டணங்களில் இருந்தும் விடுவிக்கிறது.

இயற்கை மருத்துவம் மிகவும் மலிவானது; அதே நேரத்தில் சிகிச்சை முறைகளில் மிகவும் சிறந்ததும், பாதுகாப்பு மிகுந்ததும் ஆகும்.

இயற்கைக்கு திரும்புக. 
ஊசி, மருந்து வில்லைகள், திரவ மருந்து ஆகியவற்றிகாக காலத்தையும், சக்தியையும், பணத்தையும் வீணாக்க வேண்டாம். 


இயற்கையின் விதிகள் மிகவும் சுலபமானவை. இயற்கை அன்னையிடம் (இயற்கை) மருந்துகள் ஏராளமாக இருக்கின்றன; அவற்றை உட்கொள்வதும் மிகவும் மகிழ்ச்சியாக இருக்கிறது. அவளுக்கு (டாக்டர் ஃ பீஸ்) கட்டணம் எதுவும் தரவேண்டியதில்லை. 


எளிமையான, இயற்கையான வாழ்க்கையை நடத்துக. உடல் நலம் பற்றிய விதிகளையும் பின்பற்றுக. தூய்மையை பேண வேண்டும். தெய்வீகத் தன்மைக்கு அடுத்தபடியாக இருப்பது தூய்மையே. நோய்கள் அணுகாத நிலையைப் பெறுவதுடன், நீங்கள் உயர்ந்த தரம் மிகுந்த உடல் நலத்தையும், வலிமையையும், நீண்ட ஆயுளையும் அனுபவித்து மகிழ்வீர்கள். 

எல்லா நோய்களையும் குணப்படுத்துவது இயற்கைதான் (Doctor treats; Nature cures).ஒரு டாக்டர் தம்முடைய விவேகமற்ற சிகிச்சையினால் ஒரு நோயாளியைக் கொன்று விடக்கூடும்; அல்லது நோயின் உக்கிரத்தை அதிகரித்து விடக்கூடும்.

விவேகமான முறையில் மருந்துகளை பயன்படுத்துவது தான் இயற்கைக்கு உதவியாக இருக்கிறது. உடல் நலத்துடன் இருக்கும் போதும், நோயுற்று இருக்கும்போதும், உயிரின் செயல்களுக்கு தெய்வீக சக்தி ஆதரவாக இருக்கிறது. 

மிகையான உணவாலும், தவறான உணவாலும், விவேகமற்ற உணவாலும், குற்றங்கள் உள்ள உணவாலும், உடம்பில் அழுக்குகளும், மலங்களும் தேங்கி விடுகின்றன. உடம்பில் இருந்து இந்த அழுக்குகளும், மலங்களும் வெளியேற்றப்பட்டால் எல்லா நோய்களும் குணமாகி நிறைவான உடல் நலத்தை மனிதன் அனுபவிக்க முடிகிறது. இதுவே இயற்கை மருத்துவத்தின் நிறைவான கொள்கை.

கதிரொளி சிகிச்சை, நீர் சிகிச்சை, காற்றின் சிகிச்சை, உணவின் சிகிச்சை, பட்டினி கிடத்தல் இவை எல்லாவற்றின் ஒரே நோக்கம் உடம்பில் இருந்து அழுக்குகளையும், நச்சுப் பொருட்களையும் வெளியேற்றி நிறைவான உடல் நலம், வலிமை, சக்தி ஆகியவற்றை நிச்சயப்படுத்துவதே ஆகும்.

இப்புத்தகத்தில் சுவாமி சிவானந்தர் ஒவ்வொரு நோயையும் எவ்வாறு இயற்கையான முறையில் குணப்படுத்தலாம் என்று விரிவாக அலசியிருக்கிறார். இப் புத்தகத்தின் ஒவ்வொரு வரியும், சொல்லும் படித்து, பின்பற்றி அனுபவிக்க வேண்டியவை. அன்பர்கள் இப்புத்தகத்தை சொந்தமாக்கி பயன்படுத்தி நலவாழ்வு வாழலாம். 


அதேபோல, இந்நூலில் உள்ள செயல்முறைகளை பின்பற்றி நலவாழ்வு பெற்ற அன்பர்கள், தமது நண்பர்கள், உறவினருக்கு பரிசாக அளித்து அவர்கள் வாழ்விலும் இயற்கை ஒளியை ஏற்றலாம்.

நவில் தோறும் நூல் நயம் போலும், படிக்க படிக்க ஆர்வத்தை தூண்டும் இந்த நூல் பற்றிய விவரங்கள்...

புத்தகத்தின் பெயர்: 'இயற்கை மருத்துவம்'' (Practice of Nature Cure)

ஆசிரியர்: இமய ஜோதி ஸ்ரீ ஸ்வாமி சிவானந்தா (தமிழாக்கம்: திரு.டாக்டர் ப.உருத்திரமணி, M.A., Ph.D.,

பக்கங்கள்: 526 (Hard Bound Edition). எட்டாவது பதிப்பு -2007 

பண்பாளர்கள் நால்வர் கொடுத்த பெறும் பண உதவிகளால் வெளியாகி இருக்கும் விலை மதிப்பற்ற இந்த நூலின் விலை: ரூபாய் நூறு மட்டுமே. (டாக்டருக்கு மீண்டும் மீண்டும் நாம் கொடுக்கும் ஆலோசனை கட்டணத்தை விட இந்நூலின் விலை பல மடங்கு குறைவு என்பதை கவனியுங்கள். இந்த முதலீடு உங்களையும் உங்கள் குடும்பத்தினரையும், டாக்டர்கள் மற்றும் நச்சுக்கள் நிறைந்த செயற்கை மருந்துகளில் இருந்தும் காக்க வல்ல சக்தி கொண்டது)

வெளியிடுவோர்: தெய்வீக வாழ்க்கை சங்கம், சிவானந்தா ஆஸ்ரமம், சுவாமி சிவானந்தா சாலை, இராசிபுரம்-637408, நாமக்கல் மாவட்டம், தமிழ் நாடு.

உங்கள் பொன்னான நேரத்தை இந்தப் பதிவினை படிக்க செலவிட்டமைக்கு என் இதய நன்றிகளை காணிக்கையாக்குகிறேன். 

வாழி நலம் சூழ. 

-- 

'அன்பே சிவம்' அஷ்வின்ஜி
பிரபஞ்சத் துகளில் 'நான்' யார்?

ஆன்ம நலம் பெற : www.vedantavaihavam.blogspot.com

3. இயற்கை நலவாழ்வியல் 

பற்றிய புத்தகம் அறிமுகம்.

இந்த பதிவில் நாம் காணப் போகும் புத்தகம் 

''நோய்கள் நீங்க எனிமா'' 

என்னும் மிகவும் பயனுள்ள ஒரு நூல்.

இந்த நூலை எழுதியவர் திரு. Dr. R. சுப்பிரமணியன், இயற்கை மருத்துவர், மருதமலை, கோவை. இவர் 1978 முதல் இயற்கை நலவாழ்வியலுக்காக தன்னை அர்ப்பணித்துக் கொண்டுள்ளார். தற்போது பவித்ரா இயற்கை மருத்துவமனை என்ற ஒரு நிறுவனத்தை மருதமலையில் வெற்றிகரமாக நடத்திவருகிறார். நாள்பட்ட நோய்களின் தீவிரத்தை பெருமளவில் குறைத்து, பலருக்கு முழு நிவாரணமும் தரவல்ல இயற்கை மருத்துவ முறைகளை இந்த மருத்துவமனை பல நோயாளிகளுக்கு தந்துள்ளது.

"ஆஸ்பத்திரிகளில் கொடுக்கும் எனிமாவுக்கும்,இந்தப் புத்தகத்தில் விளக்கப் பெற்றுள்ள எனிமா முறைக்கும், மலைக்கும் மடுவுக்குமுள்ள வித்தியாசம் உண்டு. இது முற்றிலும் அகிம்சை முறையில் அமைந்த சிகிச்சை வழி. இதனைப் பல வழிகளில் அன்பர் ஆர். சுப்பிரமணியம் தமது பட்டறிவின் மூலம் தெள்ளத் தெளிய விளக்கியுள்ளார். (இந்த கையேடு) இயற்கை நலவாழ்வியல் வாழ்வு வாழ விரும்பும் அன்பர்கள் ஒவ்வொருவர் கையிலும் இருக்க வேண்டிய ஒன்று. செயற்கை வழி சென்று தனது உடல் நலனைக் கெடுத்துக் கொண்டவர்கள் இயற்கைவழி திரும்ப விரும்பும் போது இது (அஹிம்சை எனிமா முறை) துணை நிற்கும் என்பது உறுதி" என்று இந்நூலின் அணிந்துரையில் மகரிஷி டாக்டர் க.அருணாசலம், (முன்னாள் எம்.எல்.சி, மதுரையில் உள்ள அகில இந்திய காந்தி நினைவு நிதி நிறுவனம் மற்றும் தமிழ் நாடு இயற்கை மருத்துவ சங்கம் தலைவர்) கூறுகிறார். 

பல நோய்களையும் நமது உடல்தான் தீர்க்க வேண்டும் என்பது இயற்கை மருத்துவத்தின் முடிந்த முடிவு. அவ்வாறு உடல் செயல்படுவதற்கு நம் குடலைச் சுத்தம் செய்து கொள்வது இன்றியமையாதது என்பதை உணர்ந்து, மலிவான விலையில் அதற்கான கருவியை செய்ய வேண்டும் என்ற ஆர்வத்தால் உந்தப்பட்டு "எனிமா கேன்" ஒன்றை உருவாக்கிப் பலருக்கும் தந்து உதவி வருகிறார் டாக்டர் திரு. ஆர்.சுப்பிரமணியன்.

"குடலைக் கழுவி உடலை வளர்" என்னும் முதுமொழியை முழு விளக்கத்துடன், அறிவியல் காரணங்களுடனும், படங்களுடனும், நோயாளிகள் வாயினாலயே அவர்கள் எவ்வாறு இந்த எளிமையான முறையை பயன்படுத்தி முழு நலம் பெற்றார்கள் என்பதனையும் இப்புத்தகம் அருமையாக விளக்குகிறது.

எந்த நோயானாலும் உணவை நிறுத்தி எனிமா எடுத்துக் கொள்ள வேண்டும். வயிறு காலியானாலே நோயின் தீவிரம் குறையும். சுத்தமான குளிர்ந்த அல்லது வெதுவெதுப்பான நீரை எனிமா கேனில் நிரப்பி செருகி (nozzle) மூலம் ஆசனவாயில் நுழைத்து சிறிது முன் சாய்ந்தோ அல்லது குனிந்தோ நிற்பதின் மூலமாகவோ அல்லது பக்கவாட்டில் படுத்திருப்பதின் மூலமாகவோ, கேனில் நிரம்பிய நீர் மலக்குடலில் செல்லும். சிறிது நேரம் நீரை மலக்குடலுக்குள் நிறுத்தி (ஓரிரு நிமிடங்கள் கழித்து) பின்னர் வெளியேற்றினால் மலம் நீருடன் சேர்ந்து பீய்ச்சிக் கொண்டு வெளி வரும். வயிற்றில் கிருமிகள் இருப்பின், வேப்பிலையை வேகவைத்து ஆறவைத்த நீர் (அ) ஒரு ஸ்பூன் எலுமிச்சை சாற்றில் நீர் கலந்தும் எனிமா கேனின் உதவியுடன் மேற்குறிப்பிட்ட  முறையில் உள்ளே ஏற்றி வெளியேற்றலாம். 

இந்த முறையால் பயன் பெற்ற பல ஆயிரக்கணக்கான அன்பர்களில் ஒருவரான திரு வி.தாண்டவராயர் (அட்வகேட், திருவண்ணாமலை), ''கடந்த பதின்மூன்று வருடங்களாக இம்முறையை உபயோகித்து என் எண்பத்தாறாவது வயதில் நோய் நொடியின்றி சுகமாக வாழ்ந்து வருகிறேன். மலச்சிக்கல், வயிற்றுச் சூடு, வயிற்று வலி, பேதிகள், உணவு சீரணம் ஆகாமை ஆகியவற்றிற்கு எனிமாவே கைகண்ட மருந்து"என்கிறார். கடுமையான வயிற்றுப் போக்கு இருக்கும் போது எனிமா கொடுப்பதின் மூலம், பல தடவை பேதியாவதை தடுப்பதோடு, உடலின் சுரப்பு நீர்கள் வெளியேறுவதையும் தடுக்க இயலும் என்கிறார் இந்த அட்வகேட்.

எனிமா சிகிச்சை என்பது ரிஷிகளால் பண்டைய காலம் தொட்டே கண்டுபிடிக்கப்பட்டு முறைப்படுத்தப்பட்ட ஒரு முறையாகும். அஷ்டாங்க யோகத்தில், க்ரியாக்கள் என்று சொல்வார்கள். பலவகையில் உடலை சுத்தப்படுத்தும் முறைகளை ஷத்க்ரியாக்கள் என்று கூறுவார்கள். அதில் ஒன்று பஸ்திக்ரியா என்பது பஸ்திக்ரியாவின் நவீனப்படுத்தப்பட்ட முறையே எனிமா கேன் ஆகும்.

வெவ்வேறு மருத்துவ நிபுணர்களால் இம்முறை உலகெங்கிலும் செயல்படுத்தப்பட்டு வந்தாலும், 1913-ல் புதுக்கோட்டையைச் சேர்ந்த ஆச்சார்யா லட்சுமண சர்மா அவர்களால் அஹிம்சா எனிமா என்ற பெயரில் எளிய கருவியாக அறிமுகப்படுத்தப்பட்டது இந்த எனிமா கருவி. இயற்கை மருத்துவ ஆராய்ச்சியாளராகிய லட்சுமண சர்மா அவர்கள் இந்தியா மட்டுமின்றி பல நாடுகளுக்கும் இயற்கை நலவாழ்வியல் தத்துவங்களை பரவச் செய்தவர். இயற்கை மருத்துவம் பற்றி பல புத்தகங்களை எழுதியுள்ள இவர் தனது 86 (1965) வயதிலும் இந்தத் துறையில் தளராது உழைத்தவர்.

நோய்கள் நீங்க எனிமா என்னும் டாக்டர் ஆர்.சுப்பிரமணியனின் புத்தகத்தில் கீழ்க்கண்ட தலைப்புகளில் அஹிம்சா எனிமா முறை விளக்கப்படுகிறது.

இயற்கையின் இனிமை.

(மலச்)சிக்கலுக்குச் சில காரணங்கள்.

மலம் செய்யும் மாற்றங்கள்.

எனிமா விளக்கம்.

ஒரே உடனடி நிவாரணி.

எனிமா எடுத்துக் கொள்ளும் முறைகள்.

கிடைக்கும் பலன்கள்.

உடற்கூறு இயலும், எனிமாவும்.

எனிமா வகைகள்.

Vaginal douche.

எனிமா தீர்க்கும் நோய்கள். 

அனுபவங்கள் ஆயிரம் ஆயிரம்.

மேலும் கண்கழுவுதல், மூக்குக் கழுவ்தல் பற்றிய விவரங்களையும், அருகம்புல்லின் மகிமையைப் பற்றியும் இந்நூலின் பிற்சேர்க்கையாக மருத்துவர் ஆர்.சுப்பிரமணியன் அழகாகத் தொகுத்துள்ளார்.

மருத்துவமனைகளையும், மருத்துவர்களையும் நாடாமல் இருக்க வேண்டுவோர் பயன்படுத்தவேண்டிய முறைகளைப் பற்றிய இந்த நூல் இயற்கை நலவாழ்வியல் வாழ விரும்பும் ஒவ்வொருவர் வீட்டிலும் இருக்க வேண்டிய அற்புதமான நல்வாழ்க்கைத் துணைவன்  என்பதில் சற்றும் ஐயமில்லை.

வாழி நலம் சூழ....

இயற்கை நலவாழ்வியல். 

நமக்கு நாமே நலம் சேர்ப்போம்.

 நீரின்றி அமையாது உலகு (திருவள்ளுவர்).

நீர் சிகிச்சை முறைகள்.

ஜலநேத்தி கிரியா - மூக்கு கழுவும் உபகரணம்

ஜல நேத்தி கருவி  மூக்கின் உட்பகுதிகளை கழுவிச் சுத்தம் செய்யும் உபகரணமாகும். பிளாஸ்டிக்கினால் செய்யப்பட்ட இவ்வுபகரணம் நீண்ட குழலை தனது மூக்காக கொண்டிருக்கும். 

  

ஜலநேதி கருவி

இதைப் பயன்படுத்தி மூக்கைக் கழுவும் பொழுது, சளி தங்கியிருக்கக் கூடிய குழிகளைச் சுத்தம் செய்து, மூக்கு வழியை ஈரப்படுத்தி, காற்றுப்பாதையின் ஆரோக்கியத்தை மீளக் கொண்டுவருகின்றது. அலர்ஜி எனப்படும் ஒவ்வாமைக் காரணிகள், தடிமன், தலையிடி, சளியடைப்பினால் ஏற்ப்படும் தலைக்குத்து (சைனசிட்டிஸ்) போன்றவற்றிலிருந்து விடுதலை பெற உதவுகின்றது.

மிகப்பழைமையான யோகா அப்பியாச முறையான கிரியாக்களில் இதுவும் ஒன்று.  சளி, ஜலதோஷம், ஒவ்வாமை, ஆஸ்த்மா போன்ற நோய்களுக்கு நல்ல நிவாரணம் தரும் இயற்கை வழியிலான நல வாழ்வியல் பொருட்களில் ஜலநேத்தி கருவி பெரிதும் துணையாகிறது.

ஸ்கன்டினேவியா நாட்டில் ஜலதோஷம் வந்தால் குணப்படுத்தும் முதல் உதவி சாதனமாக இதையே பயன்படுத்துவார்கள் என அறியும் பொழுது இயற்கை நலவாழ்வியல் கருத்துக்கள் எந்த அளவு உலகெங்கிலும் பின்பற்றப் பட்டுள்ளன என்று புரிய வருகிறது. 

ஐரோப்பிய நாட்டின் சிறுவன் ஒருவன் ஜலநேத்தி செய்து கொள்ளுதல்.

கடல் உப்பு நீரின் தொற்று நீக்கும், குணமாக்கும் தன்மைகள் பிரான்ஸ், ஜெர்மனி, பின்லாந்து போன்ற நாடுகளில் நன்றே அறியப்பட்டுள்ளன. இன்றைய நாட்களில், மூக்கு வழியை நன்றே சுத்தம் செய்யும் முறையானது, மருந்துகள், மூக்கினுள் சிந்தப்படும் துளிகள், உள்ளுறிஞ்சிகள், தெளிப்புகள் (ஸ்ப்ரே) போன்றவற்றுடன் ஒப்பிடும் பொழுது சிறந்ததாகவும், பரவலாக பயன்படுத்தப்படும் ஒன்றாகவும் இந்த ஜலநேத்தி உபகரணம் பயன்படுகிறது.

எப்படி பயன்படுத்துவது? 

தூளாக்கப்பட்ட சமையல் உப்பை இளந்சூட்டு நீரில் நன்கு கரைத்து ஜலநேத்தி கருவிக்குள் ஊற்றவும். 

உபயோகிக்கத் துவங்கு முன்பாக உப்பு நன்றாக கரைந்து விட்டதை உறுதி செய்து கொள்ளவும். 

குளியலறையில் முகம் கழுவும் தொட்டியின் முன் குனிந்து, தலையை ஒருபக்கமாக சாய்த்து, ஒரு கையில் உபகரணத்தை வைத்துக் கொள்ளவும். 

மூக்கின் பின்புறமாக அமைந்த எலும்புக் குழியிலும் (சைனஸ்), ம்யூகஸ் மேம்பரீன் எனப்படும் சளியப்படை மேற்பரப்புகளிலும், மிகவும் நுண்ணிய (உருப்பெருக்கு கண்ணாடியால் மட்டுமே பார்க்ககூடிய) மயிர் வளர்ச்சிகள் காணப்படுகின்றன. இந்த முடிகளின் அசைவானது, வயலில் காற்று வீசும் பொழுது நெற்பயிரானது ஒரேதிசையில் சாய்ந்து அசைவது போன்றிருக்கும். மெல்லிய சளியப்படையினால் போர்த்தப்பட்டிருக்கும் இம்மயிர்த் தொகுதிகளில் பாக்டீரியாக்கள், பூக்களின் மகரந்தத் துகள்கள், சிறிய தூசுகள் மற்றும் இறந்த செல்களின் சிறுதுணுக்குகள் போன்றவை இச்சளியப்படையில் ஒட்டிக்கொள்கின்றன. 

ஆரம்பத்தில்  மயிர் வளர்ச்சியின் அசைவின் பொழுது ஒட்டிக் கொண்ட இவைகள், பின்னர் ஏற்படும் தொடர் அசைவின் காரணமாக மூக்கின் அடிப்பகுதிக்கு எடுத்துச் செல்லப்பட்டு இறுதியாக தொண்டை வழியாக இரைப்பையை சென்றடையும். மலத்தில் சளி காணப்படுவது இவ்வகையில்தான். 

வைரஸ் நோய்க்கிருமிகளும், ஒவ்வாமைக் காரணிகளும், மயிர்வளர்ச்சியின் செயற்பாட்டை திறனிழக்கச் செய்யும் பொழுதோ அல்லது சளியப்படை உலர்ந்து, கடினமாகும் பொழுதோ, இயல்பான மூக்கின் செயல்பாடு தடைப் படுகிறது. 

மூக்கின் அடிப்பகுதியை உப்பு நீர் கொண்டு கழுவும் பொழுது, காய்ந்த சளியப்படை, தூசி, மகரந்ததூள்கள், வைரஸ், ஒவ்வாமைக் காரணிகள் அகற்றப்படுவதோடு, சளியப்படை ஈரப்படுத்தப்பட்டு, மயிர் வளர்ச்சியின் இயல்பான அசைவுகள் திரும்பவும் செயல்படுத்தப்படுகிறது. மூக்கின் உட்பள்ளமானது, எலும்புக்குழி(சைனஸ்)களுடன் சிறிய வழிகளினால் இணைக்கப்பட்டுள்ளது.

சளிய மென்படை, நோய் தொற்றின் போது (உதாரணம்: சாதாரண ஜலதோஷம் (காமன் கோல்ட்) வீக்கமடையும். அச்சமயத்தில் சிறு வழிகள் அடைக்கப்பட்டு சைனஸ் தோன்ற (சைனசிட்டிஸ்) வாய்ப்பளிக்கிறது. 

 

முறையாக தொடர்ந்து மூக்கை கழுவி வந்தால், சிறுவழிகள் அடைப்புக்களின்றி தெளிவாக இருப்பதோடு, உப்புத் தண்ணீர் பயன்படுத்தப்படுவதனால், காரநிலை (alkalinity) செயல்படுத்தப்படுகிறது. இதனால் வைரஸ் நோய்க்காரணிகள் வளரமுடியாது போகின்றன. 

ஆஸ்த்மா வியாதி உள்ளவர்களின் நோய்த் தாக்கத்தின் பொழுது, சளியப்படை வீக்கமடைந்து, நாசியின் உட்சுவாச வழி அடைபடுகிறது.  அதனால்தான் அவர்களுக்கு மூச்சிறைப்பு ஏற்படுகிறது. இதனால் வாய்வழிச் சுவாசம் மேற்கொள்ளவேண்டிய நிலைக்கு ஆளாகிறார்கள். இவர்கள் ஜலநேத்தி கருவி கொண்டு முறையாக மூக்கைக் கழுவுவதனால் இந்நிலை நீங்க உதவி செய்யும். 

ஏன் இதை நாம் பயன்படுத்த வேண்டும்?  

நோய் நிலைகள் இருந்தாலும், இல்லாவிட்டாலும் மூக்கை தொடர்ந்து கழுவி வந்தால், மூக்குக்குழி, மேல் சுவாசத் தொகுதி ஆகியவற்றில் ஏற்ப்படக் கூடிய நோய்களின்றி ஆரோக்கியமாக வாழலாம். காது, மூக்கு, தொண்டை நோய்க்கள் நம்மை அணுகாமல் பாதுகாத்துக் கொள்ள மிக எளிய வழியாகும் இது. 

ஆதிகாலத்தில் முனிவர்கள், சாதுக்கள் தங்கள் கையில் கமண்டலத்தை வைத்திருப்பதை படங்களில் பார்த்திருப்பீர்கள். அவர்களது ஆரோக்கியத்துக்கான யோகக் கிரியைகளை செய்யும் கையடக்கக் கருவியாக கமண்டலங்கள் பயன்பட்டன என்பது இப்போது தெளிவாகிறது. 

 

மேலே - கமண்டலத்தின் இந்நாள் வடிவம். 

மேலே - யோகிகளின் கையில் உள்ள கமண்டலம்.

பயன்படுத்தும் முறை - 

• கருவியை தயாராக வைத்துக்கொள்ளவும். பின்னர் 1 தேக்கரண்டி உப்பை கருவிக்குள் இட்டு, பின்னர் இளந் சூட்டு நீரில் (8 அவுன்ஸ்) நன்கு கரைக்கவும். நன்கு கரையாத உப்பு துகள்கள் நாசியில் அரிப்பை ஏற்படுத்தும், உப்பு நன்கு கரைந்திருந்தால் அரிப்பு ஏற்படாது.  (குறிப்பு: முதன் முறை பயன்படுத்தும் பொழுது, 1 தேக்கரண்டியிலும் சற்று குறைவாக எடுத்துக் கொள்ளலாம். சில நாட்கள் அனுபவத்தின் பின்னர், அளவை 1 தேக்கரண்டிக்கு உயர்த்திக் கொள்ளலாம். (உப்புக் கரைசலை ஒரு பாத்திரத்தில் முன்னதாக தயாரித்து பின்னர் ஜலநேத்தி கருவிக்குள் விடலாம்). 

• முகம் கழுவும் தொட்டியின் முன் நின்று கொண்டு தலையை ஒரு புறம் சாய்க்கவும் - (ஒரு காது கீழே படுக்கவாட்டாகவும், மற்றையது மேலாகவும் வரும்வரை)

• கருவியின் நீண்ட மூக்கை, மேற்புற மூக்குத் துவாரத்தினுள் உட்புகக் கூடிய தூரம் வரை செலுத்திய பின், கருவியை சற்று உயர்த்தி மெதுவாக உப்பு நீரை உள்ளே விடவும். இந்த நேரத்தில் தொடர்ந்து வாயினால் மட்டுமே சுவாசிக்க வேண்டும். அப்போது மற்ற மூக்குத் துவாரத்தின் வழியாக நீர் வெளியேறும்.

• ஏறக்குறைய பாதி நீரை ஒரு மூக்குத் துவாரத்தினுள் விட்டபின் நிறுத்தி, தலையை மறுபக்கம் சாய்ந்து, மேற்புற மூக்குத் துவாரத்திற்குள் முன்பு போல எஞ்சிய நீரை விடவும். 

 நாசியைச் சுத்தப்படுத்தும் முறை. 

படம் (B)யில் தலையின் கோணத்தைக் கவனிக்கவும்.

• இப்பொழுது மூக்குத் துவாரம் சற்று காயும் வண்ணமாக, வேகமாக வெளிச் சுவாசம் செய்யவும். அதாவது காற்றை இழுத்து வேகமாக வெளி விடவும். வெளி வரக் கூடிய கழிவுகளைச் சிந்தி அகற்றவும். சில சமயங்களில் பலதடவை சிந்தி கழிவுகளை வேண்டியிருக்கும். 

• இப் பயிற்சியினை ஆரம்பத்தில், காலையிலும், மாலையிலும் செய்யலாம். அதிகமாக கழிவு தங்கியிருந்தால், நாளுக்கு 3 - 4 தடவை செய்யலாம். ஒரு வாரத்திகுப் பிறகு, மூக்கு அடைப்பின்றி, சுத்தமாக இருப்பதை உணர்வீர்கள். சுத்தமான இந்நிலையில, தினமும் காலையில் ஒரு முறை செய்து வந்தால் போதுமானதாகும். 

• மேலும் மூக்கடைப்பு அல்லது சளிகூடி அடிக்கடி சிந்தவேண்டியாதாக வேண்டி வந்தாலோ, சளி ஒழுகினாலோ அப்போது எல்லாம் அடிக்கடி மூக்கை இதே முறையில் கழுவிக் கொள்ளலாம். 

முறையாக தொடர்ந்து மூக்கைக் கழுவுவதனால் ஏற்படும் பல நன்மைகளில் சில:- 

• நாசித் துவாரங்களில் தெளிவான, அடைப்பில்லாத வழி கிடைப்பதனால் சுவாசம் இலகுவாகிறது. அதிகமாக சுரந்த சளி, மற்றும் அதில் சிக்கிய கிருமிகள், ஒவ்வாமைக் காரணிகளும், கழிவுகளும், தூசி, புகை, அரிப்பை ஏற்படுத்தும் அடைப்புகள் எதுவாகிலும் கழுவி அகற்றப்படுகிறது. 

• நாசித் துவாரங்கள் உலர்ந்து போயிருந்தால் அவற்றை இந்த முறையிலான மூக்குக் கழுவுதல் ஈரப்படுத்துகின்றது. இதன் மூலமாக மூக்கின் உலர் நிலையால் ஏற்படும் சளித் தேக்கத்தை அகற்ற உதவுவதோடு, மூக்கு இரத்த போக்கு தவிர்க்கப் படுகிறது. 

• உடலின் முதல் நோயெதிர்ப்பு செயல்பாடு அமைந்துள்ள மெல்லிய சளியப்படையலுக்குள் (mucus membreen) கிருமிகள் மற்றும் அசுத்தங்கள் சிக்குவதினால் சளியப்படையலின் நோய் எதிர்ப்பு செயல்பாடு குறைந்து போகிறது. இந்த முறையில் சுத்தம் செய்யும் போது சளியப்படைத் தொகுதிகள் திறம்பட செயல்படத் துவங்குகின்றன. 

• இந்த செயல் முறை சுலபமானது. இயற்கை வழியிலானது, மருந்துகளற்றது, எனவே பக்க விளைவுகள் அற்றது. மேலும் செலவு குறைந்தது, எவரும் பிறர் துணையின்றி தனக்குத்தானே எளிமையாக செய்துகொள்ளக் கூடியது. 

• மூக்கின் உட்புறம் ஆரோக்கியமாக இருப்பதனால் சுவையுணர்வும், முகர்வுணர்வும் (மோப்பம்) மேம்படுகிறது.

• சுவாசத் தொகுதி சம்பந்தமான நோய்களான ஆஸ்மா, மகரந்தக் காய்ச்சல் (ஹேஃபீவர்),  நீண்ட நாளாக இருக்கும் ஜலதோஷம் (கோல்ட்), சளியினால் தோன்றும் காய்ச்சல் (இன்புளுயன்சா), சைனஸ் என்னும் சளிச் சேர்க்கை, போன்ற தொல்லைக்களில் இருந்து நலத்துக்கு மீண்டு வர மிகவும் பயனுள்ளதாகும். 

• மூக்கு குழல்களின் பாதைகள் சுத்தமாவதினால் அதுவரை செய்து வந்த  வாய்வழிச் சுவாசம், இயல்பான மூக்கு வழிச் சுவாசத்திற்கு மாற்றப்படுகின்றது.

• மூக்கைக் கழுவி சுத்தமாக வைத்திருப்பதனால், தொண்டை, சுவாசக் குழல் பாதைகள் சுத்தமாக இருப்பதுடன் பார்வை தெளிவுறுவதுடன், தெளிவான சிந்திக்க வழி உண்டாகிறது. 

• நோய்க் காரணிகள் அகற்றப்படுவதனால் உடலின் நோயெதிர்ப்பு செயற்பாட்டிற்கான தேவை குறைக்கப்படுகிறது. நோய் எதிர்க்கும் செயல்களைச் செய்ய உடலுக்கு நிறைய சக்தி தேவைப் படும். அச் சக்தி விரயமாகாமல் தடுக்கப்படுவதினால் நமது ஆரோக்கிய நல வாழ்வு மேம்படுகிறது.

முக்கிய குறிப்பு: ஜல நேத்திக் கிரியா முறையில் மூக்கு கழுவும் முறையானது, மிகவும் நாள்பட்ட நோய்களுக்கு (chronic diseases) சிகிச்சை தரும் முறை ஆகாது. மூக்கு, காது, தொண்டை வழிகளில் நீண்ட நாள் நோய்கண்டவர்கள் கட்டாயம் மருத்துவ ஆலோசனை பெறவேண்டும்.

நன்றி: கூகிள் இமேஜஸ் படங்கள்.


இடுகைக்கு நன்றி: நலமே பொலிக வலைப்பூவில் இருந்து மீள்பதிவிட்டவர் : அஷ்வின்ஜி.

2. ஆரோக்கியம் ஆனந்தம்.


இயற்கை நலவாழ்வியல்.

முந்தைய பகுதிகள்

அறிமுகம். 
பகுதி: 1

2.  இயற்கை உணவு என்றால் என்ன?

இயற்கை அன்னை நமக்கு தயாரித்து வழங்கும் உணவையே இயற்கை உணவு என்கிறோம். (சூரிய வெப்பத்தால் சமைக்கப்பட்ட உணவு). இயற்கை உணவை அதன் தன்மை மாறாமல் சமைக்கமால், வேகவைக்காமல், வறுக்காமல் அப்படியே பச்சையாக உண்ண வேண்டும்.  நாம் உணவை சமைப்பதால் அதன் சத்துக்கள் அழிந்து விடுகின்றன. நாம் இறந்த உணவையே உண்கிறோம். அதனால் தான் மனிதன்  நோயாளி  ஆகிறான்.  உலகில் வேறு எந்த உயிரினமும் சமைத்து உண்பதில்லை.

        

3. மனிதன் சைவமா?

(1) மனிதன் மற்றும் தாவர பட்சிணிகள் நீரை உறிஞ்சி குடிக்கும். ஆனால் மாமிச உணவுகள் நீரை நக்கி குடிக்கும்.
 

(2) மனிதனுக்கும், தாவர பட்சிணிகளுக்கும் நீளமான சிறுகுடல் இருக்கும். ஆனால் மாமிச பட்சிணிகளுக்கு சிறுகுடல் நீளம் குறைவாக இருக்கும்.
 

(3) மாமிச பட்சிணிகளுக்கு மாமிசத்தை கிழித்து உண்ண கோரைப் பற்கள் உண்டு.  ஆனால் நமக்கு உணவை நன்கு மென்று உண்ணக் கூடிய  வகையில் பற்கள் அமைந்துள்ளது.
 

(4)சைவ உணவு உண்போருடைய ஆயுட்காலம் அசைவ உணவு உண்போருடைய ஆயுட்காலத்தை விட அதிகம்.

        

4. மனிதன் ஒரு பழந்தின்னி

(1)நிலத்திற்கு கீழ் விளையும் பொருட்களை உண்ணும் வகையில் பன்றி, எலி, முயல், போன்ற மிருகங்களுடைய வாய் அமைப்பு நிலத்தை தோண்டு வதற்கு ஏற்றாற் போல் அமைந்திருக்கும். 
 

(2)மேய்ச்சல் மிருகங்களின் பற்கள் மற்றும் வாய் அமைப்பு புற்களை அசை போட்டு சாப்பிடும் வகையில் 
அமைந்திருக்கும்.
 

(3)குரங்குகள், அணில்கள் போன்ற மிருகங்களுக்கு மரத்திற்கு மரம் தாவி பழங்களை உண்ணும் வகையில் அதனுடைய உடலமைப்பு இருக்கும். 
 

(4)மனிதனால் மட்டும் தான் இரண்டு கால்களால் நின்று பழங்களை பறிக்கவும், உயர்ந்த மரங்களில் ஏறவும் முடியும். 
    

இதனால் நாம் பழந்தின்னி வகையை சேர்ந்தவர்கள் என்பதை அறியலாம். அதனால் நாம் மெதுவாக அசைவ உணவிலிருந்து--- சைவ உணவிற்கும் பிறகு அதில் பால் பொருட்களை தவிர்த்தும் பிறகு  இயற்கை உணவிற்கும் பிறகு பழ உணவிற்கும் மாற முயற்சிக்க- வேண்டும்.

(தொடரும்)

நன்றி: இரதி லோகநாதன், கோவை.


முந்தைய கட்டுரையைக் காண: 1. ஆரோக்கியம் ஆனந்தம்.